حتى يتآكل السندان

بابا حكالي زمان عن راجل حداد بخيل ورخم استلف فلوس من واحد صاحبه ومارجعهالوش فكان صاحبه كا مايجيله يطلب الفلوس بتاعته الحداد يقوله بكرا وبكرا يقوله بعده وهكذا.. والأمر بقى بيتكرر يوميا لغاية ما في يوم الحداد مرض وابنه هو اللي فتح المحل ف جه الراجل صاحب الفلوس يطلب فلوسه فإبن الحداد عمل نفسه لئيم فقال للراجل لما السندان ده يدوب -ودي حاجة مابتحصلش كل خمسين سنة- ابقى تعالى خد فلوسك والراجل سمع الكلام وروح.  ولما روح الولد لأبوه وحكاله فأبوه زعل وقاله ياغبي السندان هيدوب في يوم من الأيام.. انما تسويف يوم بعد يوم ممكن تستمر فيه للابد..
الخلاصة : لازم تربط اللي قدامك بكلمة وعقد ولو ظالم أحسن ماتسيب الأمور سداح مداح يتحكم فيها الأقوى بمزاجه.

علمانية فور داميز

أزمة فقهية بسيطة ومعقدة في آن واحد.. تناقل بعض الطلاب في المدينة الجامعية بالزقازيق خبر أن أحدهم يصطحب صديقان مسيحيان ليذاكروا داخل مسجد المدينة ويدخنون السجائر أثناء المذاكرة..
وجود كلمة مسيحي في الموضوع يجعل ألسنة البعض لا تنطق سوى بكلمة حرام.. ولما تدخلت لأوضح أن الأمور بسيطة يبادرك أحدهم يقول : انت ليبرالي وعلماني وماتفتيش في الدين. وكإني كافر مثلا..
طب يا جماعة الخير الآية القرآنية بتحرم دخول غير المسلمين للمسجد الحرام بس مش كل المساجد لإن الأرض كلها مسجد لأي مسلم.. مين يسمع؟ انت متساهل ومفرط في دينك.. ولازم يحترموا بيت ربنا.. وكثيرا من ألحان هذا المقام..
بل ذهب البعض في الافتاء إلى التساؤل ماذا إن كان هذا المسيحي جنبا ودخل الجامع؟.. وأنا أتساءل وما أدراك أنني حين أدخل المسجد لست جنبا؟
كم من الهراء والخراء الفكري تم تناقله في اليوم الثاني في مكتب مدير المبنى باعتباره أبا حنيفة وهو غير متعمق في الدين على الإطلاق.. تساءلت: ياجماعة فين حسن الخلق؟ انتوا ماسمعتوش عن الرسول ص لما ترك الأعرابي يكمل بولته في المسجد مخافة ان يفزعه..؟ وتلاقي كل أنواع اللامنطق في الردود لما تقولهم دليل.. مثلا يقولك: يعني هما المسيحيين بيخلوا حد مسلم يدخل الكنيسة بتاعتهم؟ أرد واقولهم أنا نفسي دخلت الكنيسة بكل حرية وسهولة.. يقعدوا يبرطموا..
الخلاصة إن أنا كنت عايز اقنعهم بفكرة ان مش نهاية الدنيا ان حد مسيحي يدخل مسجد.. والصراحة تقبلوها لإن ماعندهمش سبب ديني مقنع لرفضها بس اشترطوا الالتزام بآداب المسجد ومايشربش سجاير جواه.. الغريب إني وأنا باصلي المغرب النهاردة لقيت واحد فاتح مجلة فيها صورة لهيفاء وهبي وبيبحلق فيها بالإضافة لإن المسجد بقى قاعة نوم عشان فيه مراوح وكدة غير انهم أحيانا بيشغلوا أغاني على موبيلاتهم وحد سب الدين قبل كدة في المسجد وقال ألفاظ قبيحة جوة المسجد والناس سكتت لمجرد انه مسلم..
المهم إننا خرجنا بحل علماني يجنبنا الأزمة دي وهي ان ممنوع حد يجيب صحابه من خارج المدينة وإن تدخين السجاير داخل المسجد ممنوع عالمسلم والمسيحي وغير كدة من حق أي حد يدخل أي حتة.. بس بعد ماشوفت المرار الطافح من العقليات المريضة اللي بتستسهل تقول حرام ولا يجوز وعندها عصبية تعميها عن الاستماع لرأي ديني صحيح لمجرد انه مش على هواها رغم انهم عملوا المشكلة بسبب الدين مش بسبب ان العيال المسيحيين ريحة رجلهم وحشة :-) ولا إن السجاير بتجيب حساسية..
وأبسط حجة ممكن تتقالك لو قلت معلومة فقهية انت عارفها مش على هواهم إنك ليبرالي أو علماني.. وطبعا الناس بتصدق أي عيل بشخة عنده شعرتين في وشه وانا غلبان يابيه مدمن جيليت ;-)
الخلاصة إننا عندنا أزمة وعي مالهاش علاقة بمين الرئيس الجاي.. كل اللي نقدر نعمله اننا نحاول نمنع استغلال جهل الشارع لتمرير دستور متطرف دينيا ونبدأ فورا في تنوير الناس.. دي معركتنا الحقيقية.. الوعي..

Followers

Featured Posts